monumenta.ch > Hieronymus Incertus > Hieronymus Incertus, Epistolae, p27, III.
Hieronymus Incertus, Epistolae, EPISTOLA XXVII, SEU SERMO DE QUADRAGESIMA., , II. <<<    

III.

1  Hoc totum idcirco replicamus, fratres charissimi, ut sollicita mente caveamus, ne exeuntes de Aegypto, et per quadraginta dies, quasi per quadraginta annos ad repromissionis terram per eremum festinantes, desideremus carnes et ollas Aegypti, et a serpentibus mordeamur. 2  Exivimus de Aegypto: quid nobis cum Aegyptiis cibis? Qui habemus coelestem panem, terrena alimenta quid quaerimus? Reliquimus Pharaonem, invocemus auxilium Domini: ut nobis Aegyptius rex in credentium baptismate submergatur. 3  Ibi pereant equi et ascensores eorum: ibi fremens adversarii necetur exercitus. 4  Non murmuremus adversus Dominum, ne a Domino percutiamur. 5  Non detrahamus de sacerdotibus nostris: et magis a vitiis ieiunemus quam a cibis: licet et ciborum abundantia sint fomenta vitiorum. 6  Si Aaron et Maria contra Moysen murmurantes, Dei pro servo suo senserunt vindictam: quanto magis si aliquis nostrum praepositum suum vipereo ore laceraverit, divina sententia punietur! Sed et sacerdotibus simpliciter praecavendum est, ne duplici mente sint, ne Domini ambigant potestatem. 7  Si etiam Moyses et Aaron (qui ad aquam contradictionis visi sunt fluctuare) non meruerunt terram repromissionis intrare: utique multo magis nos qui peccatorum premimur pondere, non valebimus fluentum Iordanis transire: et ad locum circumcisionis, id est, Galgala pervenire, si scandalizaverimus unum de minimis istis. 8  Unde tam labores pastoris, quam gregis fecunditas: tam ubertas messium, quam agricolae studium, Domini horreis praeparentur. 9  Toto nisu ac labore tendamus, ut digni efficiamur adventu paschae, et carne ac sanguine agni Christi Iesu. 10  Amen.